Մրցույթի մասին
«Պատմության մրցույթներ» նախաձեռնությունը մեկնարկել է 2001թ․ EUSTORY ոչ ֆորմալ ցանցի կողմից և նախատեսված է աշակերտների, ուսանողների և երիտասարդ հետազոտողների համար։ 2001թ․-ից ի վեր անցկացվել է ավելի քան 25 մրցույթ, որոնց մասնակցել են ավելի քան 230․000 երիտասարդներ ողջ Եվրոպայից։
2021թ․ Հայաստանն առաջին անգամ միացել է այս նախաձեռնությանը։ 2024թ․ կանցկացվի երկրորդ «Պատմության մրցույթը» հանրակրթական դպրոցների 9-12-րդ դասարաններում սովորող աշակերտների համար։ Մրցույթի շրջանակում աշակերտները պետք է կատարեն անհատական և/կամ խմբային հետազոտական աշխատանք (նախագիծ) նախապես սահմանված թեմայի շրջանակում և ներկայացնեն արդյունքները նախընտրած որևէ ձևաչափով (շարադրություն/ էսսեյ, ֆոտո պատմություն, վիդեոպատմություն, պաստառ, փոդքասթ, պերֆորմանս, այլ)։
Մրցույթի թեմա
Ծրագրի մասնակից 4 երկրների (Հայաստան, Վրաստան, Ուկրաինա, Մոլդովա) համար 2023 – 2024թթ․ փուլի ընդհանրական թեման է սահմանվել «Ուսումնասիրելով պատմության վրա հիմնված քարոզչությունը Հայաստանում, Վրաստանում, Մոլդովայում և Ուկրաինայում»։
Հայաստանի ազգային թեման է՝ «Պրոպագանդան որպես խորհրդային գաղափարախոսության գործիք Հայաստանի հանրային տարածքում, կենցաղում, մշակույթի և կրթության մեջ»։
Ո՞վ կարող է մասնակցել մրցույթին
Պատմության մրցույթին կարող են մասնակցել նախագծում ընդգրկված և վերապատրաստված ուսուցիչների կողմից ձևավորված աշակերտական խմբերը / խմբերի անդամ աշակերտները, ովքեր սովորում են 9-12-րդ դասարաններում։ Նախագծի 2023-2024թթ․ շրջափուլում ընդգրկված են ՀՀ Շիրակի, Լոռու, Տավուշի, Գեղարքունիքի, Կոտայքի, Արմավիրի, Սյունիքի մարզերի և Երևանի հանրակրթական դպրոցներում դասավանդող շուրջ 54 ուսուցիչներ։
Պատմության մրցույթին մասնակցելու համար յուրաքանչյուր մասնակից (թիմ կամ անհատ) կարող է ուղարկել միայն մեկ հայտ։ Եթե թիմը ներկայացնում է խմբային աշխատանք, թիմի յուրաքանչյուր անդամ կարող է նաև առանձին անհատական աշխատանք ներկայացնել:
Ինչպե՞ս ներկայացնել հայտը
Պատմության մրցույթին մասնակցելու համար հարկավոր է լրացնել առցանց հայտը կամ ուղարկել աշխատանքը asryan@dvv-international և nona.poghosyan1@gmail.com էլ․ հասցեներին։ Աշխատանքները պետք է ներկայացնել մինչև 2024թ․ մայիսի 30-ը։ Ավերի ուշ ներկայացված աշխատանքները չեն դիտարկվի։
Աշխատանքների գնահատում
Ներկայացված աշխատանքները գնահատվելու են պրոֆեսիոնալ ժյուրիի կողմից՝ հետևյալ չափանիշների հիման վրա․
- Աշխատանքը ամբողջականորեն ներկայացնում է ընտրված թեմայի շրջանակներում կատարված հետազոտական նախագիծը – առավելագույնը 10 միավոր:
- Հետազոտության համար ընտրված ձևաչափը լավագույնս է արտացոլում նախագծի բովանդակությունը – առավելագույնը 5 միավոր:
- Աշխատանքի հիմքում ընկած հետազոտական մասը տեսանելի է, հիմնավոր, հավաստի աղբյուրների վրա հիմնված, տեղեկատվության հավաքագրման համար օգտագործված են առնվազն 3 աղբյուր – առավելագույնը 15 միավոր:
- Հավաքագրված տեղեկատվությունը պատշաճ վերլուծվել է – առավելագույնը 10 միավոր:
- Հետազոտական նախագծի արդյունքները ներկայացված են կրեատիվ/ստեղծագործ մոտեցումներով – առավելագույնը 5 միավոր:
Խրախուսում
Լավագույն աշխատանքների հեղինակները կստանան խրախուսական մրցանակներ դպրոցի համար, ինչպես նաև հնարավորություն կունենան մասնակցելու ուսուցիչների և աշակերտների համար նախատեսված փորձի փոխանակման միջազգային միջոցառումներին։
Ներկայացված աշխատանքները կհրապարակվեն նախագծի կայքում։